BE.215 Logu no.88
NA MARTUA NINNA JESUS

Ayat 1
Na martua ninna Jesus Jesus Na pogos tondina i
Ai langkana do na tulus Tu banuaginjang i
Sai na sonang roha ni Na manggolom hata i

Ayat 2
Nang na marsak pe tarbahen Sonang do rohana i
Ai arsakna i mambahen Ro na mangapuli i
Sai na sonang roha ni Angka naung tarapul i.

Ayat 3
Na martua do dohonon Na lambok marroha i
Ai nasida do manean Nasa na di tano i
Sai na sonang roha ni Na mangalo rimas I


Ayat 4
Molo mauas tondimuna Mida hatigoran i
Na martua do hamuna Ai tutu ma jumpang i
Sai na sonang roha ni Na marhatigoran i

Ayat 5
Angka na marasi roha Ninna Jesus Tuhan i
Angka i do siasian Balos ni asina i
Sai na sonang roha ni Siasii dongan i

Ayat 6
Angka na lidang marroha Na so saor tu dosa i
I do na tarbaen marnida Ama na badia i
Sai na sonang roha ni Na pasiding dosa i

Ayat 7
Angka na manuan dame i dietong Debata
Songon anak ai nasida Sada dohot Debata
Sai na sonang roha ni Na mambahen dame i

Ayat 8
Dohot angka na binuru Ala hatigoran i
Sipujion ai marguru Tu porsukna upa nii
Sogot di na sonang i Mullop ma tuana i.
